كتب الصفحي فتحي بن لزرق مقالا جاء فيه:

كلام_الحاج
اليوم الصباح بكرت بدري ونزلت الى المنصورة وشربت شاي واكلت خمير من عند الحضرمي ..
المهم لاقيت واحد شيبة هناك وجلسنا نتكلم عن الوحدة والانفصال .
قال لي يا ابني شوف باعطيك كلام عن الوحدة والانفصال من الطرف واشتيك تكتبه بصفحتك.
قلت له :" مرحبا ياحاج؟
قال :" شوف الوحدة تشتي عدل والانفصال يشتي رجال دولة ..
قلت كيف ياحاج؟
قال :" شوف الوحدة تمام ومافي أي خلاف عليها لكن نريد وحدة عادلة بلا تمييز ولا فوارق ولا ظلم ونريد وحدة دولة ومؤسسات ونظام وقانون ونشتي الناس يكونوا سواسية بكل شيء وفي كل شيء  الحق اللي لصاحب صنعاء مثله يكون لصاحب عدن.
قلت له :" والانفصال؟
قال والانفصال يشتي رجال دولة ويشتي نظام وقانون مش تقول لي انفصال انفصال وانت جالس تنهب الأراضي وتسرق وتعربد وتفسد وتتاجر بكل حاجة سيئة وتبيع كل شيء لصالحك انت واصحابك وتقول للناس اصبروا (الجنوب قادم) لا ياحبيبي معك دولة نظام وقانون وباتعطي الناس معك حقوقها مالم اسرح لك.
قلت :" كلام وقيص  طيب والحل؟
قال :" الحل نحن لامع الانفصال ولا مع الوحدة نحن تعبنا ونشتي حقوقنا ونشتي نعيش ونشتي راتب وخدمات وصحة وتعليم ونشتي نعيش زي ماتعيش الناس في كل الدول نحن كرامتنا مرمطوا بها في الأرض واي حد بيعمل لنا نظام وقانون ودولة ورواتب وأمن  وامان وخدمات وتعليم وصحة نحن معه .
سكت شوية وقال :" ممكن تكتب هذا على لساني؟
قلت له :" مرحبا وها انا انقل وجهة نظره .. واضع عليكم هذا السؤال  هل يمثلكم  هذا الكلام؟
وماهو ردكم عليه؟
احتاج اجابتكم ..
فتحي بن لزرق
22 مايو